Somaliwey.com(Gothenborg 31/12/2004)

Musiibo Rabbaaniyan ah markey timaado waxey Diinteena Muqadaska ah iyo Quraankuba ina farayaan in lugu samro, Illaaheyna looga duceysto inaan musaa’ibtaas iyo kuwa lamidka ah ummada ku salidin.

Dhibaabaddii baaxada weyneyd ee ka dhashay dhulgariirkii badda ee koonfur bari qaarada Aasiya waxey aheyd mid ku timid amarka Eebe in intaasoo dad ahi ay galaftaana ay xukmaneyd.

Hadaba beesha caalamka iyadoon u kala harrin dadkii ay waxyeeladdu gaartay waxey si deg deg ah ula gaareen gar gaar bani’aadnimo heerkii ugu sareeyey.

Taasina waxey natusineysaa in weli caalamku uu ku dambeeyo garasho mug weyn leh marba hadaan la eegin siyaasad iyo diin lugu colaadinayo qowmiyado tabaaleysan.
Soomaaliya oo kamid ah dalalka ay dhibta ugu yar soo gaarsiiyeen mowjadihii badda ayaa la rusan yahay iney geeriyoodeen dad boqolaal gaaraya tirro kale oo aad u badana ay dhaawa iyo hoy la’aan i heyso balse tirro intaas ka badan la filanayo.

Su’aashu waxey hadaba Soomaaliya oo muddo afar iyo tobban sanno ah u af duubneyd cadowga sokeeya ee damaciisa yahay wax xukun ayaan ciddi u maqneyn. Taasina waa ayaan darro ay taariikhda modow ee qowmkani baal dahab ah ka gashay. Goobihii waxyeeladu soo gaartay guud ahaan beesha caalamka wey ka indho qarsooneyd xog rasmi ah oo arintaasi la xirriirtana looma soo gudbin, sababtu waxey tahay iyadoo aan Soomaaliya ciddi qiimo sidaas ah heysa jirin. Sababtuna waa dad gacmahooda isku halaagay afar jiho ee dunidana daadsan iyagoo qaran laawayaal ah.

Hadaba haddii caalamku uu gar gaar bani’aadnimo iyo mid kaleba u fidinayo dalalka ku yaala koonfur bari ee Aasiya, maxaa dadkeeni loo arki waayey miyaan qaarkood kamid aheyn dadkii musiibadda soo gaartay? Dowlad ku sheega dagaal oogeyaalka ee Kenya lugu soo dhisay iska daa kaalmaati ay gasho waxey dhumisay maslaxaddii caamka aheyd ee dalka, miyaan damiir naxa ku oolin ragga xukun doonka ah ee horboodaya dowladaasi?
Ganacsato ku sheega iyagana baneystay hantidii Qaranka, miyaan laftoodu diirimaad laheyn?? Soomaalidii markey meel iskugu timaado xamaasad saacado ah qabi jiray xageey mareen?? Aaaway ururaddii rayidka ee iyagu ku qaraabta magaca bulsho maxaa codkoodi loo maqli waayey?? Kaalintii culimadda ee siyaasadda ciyaarteedii la jaan qaadi waayey laftooda xagey martay ducadii iyo Alle barigii mise uurkaba kama aheyn oo xaalkoodu maba dhaafo ”Mad madoobe Allaa ku yaqaan”

Soomaalida qaxootiga reer galbeedka jooga ee iyaguna bisha markey dhamaato dambiishoodu loogu shubo shilimaadka ceyrta ma awoodi waayeen iney ”min 1 doolar iska aruurshaan”? Xaawaladeydii magacyada badneyd ee ka mcaashtay hantida shacabka maxaa ku dhacay? Kun shilin miyey awoodi waayeen iney ku tabarucaan?? Mise bulshaddu guud ahaantee waa ”Isma dhaanto iyo dhasheed?”
Oo iyagaaba u baahan kaalmo bani’aadanimo? Ma waxey dooneysa guud ahaan bulshadaasi iyo siyaasiinteeda gaarka yar in diyaaradaha Helopcobter-ka Mareykaknku u soo tuuraan cuntada baakaeysan ee qaxootiga loogu talagalay?
Haddii taasi jawaabtu tahay HAA, waxaan qabaa in la dhowro marka laga soo faaruqo Aasiya oo ah meel ka nafci badan Soomaaliya, gurmadka loo fidiyeyna ay ujeedo dahsoon ku jirri karto.

Ugu dambeyntii waxaa Soomaalida iyo intii ay Islaanimo ku dambeyso soomaalinimo warkeedba daaye la gudboon in ummaddii waxyeelada kasoo gaartay ee maal iyo nafka ku waayey duufanadii badda loo gurmado oo la eeggo sida gaalka aan diin iyo dhaqan midna la wadagin eeshiyaanka u ugu gurmaday.
Waxaan ummadaasi dhiban iyo kuwa iska qaadi waayey heeryada cadowga sokeeye leeyahay Ilaahey usoo laabata kuna samra shartiisa. Ogaada in tani tahay mid kamid ah imtixaanada Alle qoorta idiin suray adinkoo dhalasho, dhaqan iyo diin wadaaga in sidan masiirkiina noqday!

Ikraam Cali-kaar
ikraam@journalist.com