| Somali News | ||||||||||||||||||||||||||||||||||||
|
||||||||||||||||||||||||||||||||||||
MA LAGA YAABAA IN KUWII SHALAY MUDAHARAADAYAY AAN ARAGNO IYAGOO BERRI KU MUDAHARAADAYA DALKA ARGAGIXISADA HA NALOOKA SAARO IWM
23 May 2009 SMC Kooxdaan Sh. Shariif (oo aan shakhsi ahaan u arko nin miskiin ah oo dabin wayn loo dhigay) hoos fadhida oo ka soo kala safray waddamo kala duwan waxaan labadii sano oo la soo dhaafay ka joogi weynay baqbaqdooda, hanjabaadooda, calyadooda, iyo caydooda iyagoo ku hadaaqi jiray erayo ay ka mid yihiin Hebel Itoobiyuu u shaqeeyaa, safaaradda Itoobiyaa ayaa lacag intaas le’eg siisay, kaligii taliyaha kaliya ee Geeska Afrika jooga waa Meles Zenawi iwm ah ilaa ay Jabuuti u soo calaf doonteen oo intii Asmara loo diiday inay ka baxaan mooyee intii soo dhuuman kartay iyo kuwii Yurub iyo Maraykanka joogay ay hoteelladii Jabuuti markay ka buuxsameen waddooyinka iyo mafrashyada seexseexdeen. Dad badan ayaa shalay u qabay in dadkaan mudaharaadka iyo qabqabtu ay xabashi nacayb ka ahayd hase yeeshee, maanta markii ay caddaatay in dadkaani hunguri/kursi doon ahaayeen oo xitaa ay mudaharaadkii shalay Meles Zenawi lagu mudaaharadayay ee G20ga ay ka qaybgeli waayeen oo walaalohood ONLF dhabarka u duween maadaama wixii ay u mudaharaadi jireen ay heleen iyadoo la ogyahay sida ay taageerayaasha ONLF qolyahaan ula mudaharaadi jireen, ayaa maanta ay xaaladdu ku dhanaan tahay... xagga iyo xaggaba waa laga soo galay .... kor iyo hoosba waa looga yimid .... kooxahay isku halleeynayeen oo dhammi waa uga bexeen..... godkoodiibaa biyo ugu soo galeen .. Yugaandhees taangiyadood ayaa manta gaashan u ah. Kooxdaani markii ay gaareen hadafkooodii riqiiska ahaa waxay horay ka bilaabeen hawlihii lagu yaqaanay kuwa la midka ah. Markiiba waxay bilaabeen, allaylehe hadda magacaygu diiwaanka xildhibaan ama wasiir gelyaye, xaggee ugu dhow oo wax kaga dhuftaa. Qaar iyagoon weli kabaha iska bixin markay xamar yimaadeen ayay Meles Zenaawigii ay shalay caayayeen soo dhunkadeen, Qaar baddii bay iibsadeen, qaarna odaygii Walad Cabdalle ahaa bey la hadleen oo yiraahdeen war meesha waan ku jactadnaye, shariifkuna nin wax fahmaya ma ahee safiir iyo bal wax noo fiiri, qaarna weli waxay ka warsugayaan bal jagooyin cusub oo soo baxa iyo in Shariifku si fiican u saldhigto oo weli waxay sii ilaalainayaan ururradii ay lacagta ku cuni jireen oo ku mudaharaadi jireen si markaa, iyagoo saaxiibadood la tashanaya, ay iyaguna meel u ciriirsadaan. Kuwaan dambe oo badankoodu Yurub iyo Maraykanka weli joogaan si ay u sii ilaaliyaan ururradii lagu mudaaharadi jiray (oo runtii shaqo la’aan ba’ani ay soo food saartay iyagoo aan mukhaayadihii ay hore u fariisan jireen hadda fariisan karin maadaama ay shirkii Jabuuti ka soo qaybgaleen) ayaa ayaamahaan afka furtay iyagoo leh waa in dagaalka degdeg loo joojiyaa, shacabka ha loo naxariisto, labada qoloba waxaan ugu baaqaynaa inay xabbadda joojiyaan oo miiska wadahadallada soo fariistaan iwm. Waxaase qofkii u fiirsadaayi uu arkayaa nimankii shalay lahaa dagaalku waa soconayaa ilaa cadawga waddanka ku soo duulay laga saarayo ayaa maanta leh shacabka ha loo naxariisto oo xabbadda ha la joojiyo … oo shalay shacabku ma dhimmanayn miyaa? … mise shacabku waxay kala jecel yihiin xabbadda ka timaadda taangiga Itoobiya iyo tan taangiga Yugaandha … ma shacabka ha loo naxariisto mise safiirka noo soo dhow yaan nalaka qasin baa arrintu… waxbaa noo bidhaamaye kuwaani xaggee ka soo bexeen … may gobolladoodii iska joogaan ... maa lacag iyo wax lagu fiiriyo oo jeebabka loo buuxiyo. Shaki yari iigama jiro in kuwo badan oo maanta Geska Afrika jooga ay soo guryo noqon doonaan waaba haddii ay duufaanta socota ka badabaadaane (wararka ugu dambeeyay waxay sheegayaan in qaarkood garoonka diyaaradaha Muqdisho ay dhooban yihiin qaarna mar hore huluuleen iyagoo lacago faro badan jeebka ku wata), waxaanse is weydiiyaa ..... ma laga yaabaa markay cayrtoodii iyo ururraadii ay lacagta beenta ah ku qaadan jireen u soo noqdaan inay soo abaabulaan mudaaharaadyo ay ku dalbanayaan in waddankooda argagixisada looga saaro iyagoo leh adduun weynaha waxaan ka dalbanaynaa in Al-qaacida waddanka nalooka saaro … waddankayagii Al-qaacidaa ku soo duushay ... daka dalkayaga haysta Afghanistaan bay ka yimaadeen iwm. Qofkii arrintaa fogeysanayoow haddaba maad maqashaid iyagoo Xamar jooga oo ku qaylinayaa waddankayaga ajaanib baa ku soo duushay … dad caddaan ah ayaa Al-shabaab ka garab dagaallamaya…. Gobolka Banaadir dad gobollo kale ka yimid baa ku soo duulay iwm. Marka akhristoow waxaa inoo ballan ah marka ay soo abaabulaan mudaahraadka noocaas ah inaan ka garab abaabulno looxaan ay ku qoran yihiin NO MORE CORRUPT LEADERS, NO MORE 4.5 POCKETS. NO MORE SEA SELLERS, NO MORE SWISS AND DUBAI BANK ACCOUNTS, NO MORE WARLORDS, NO MORE 20% COMMISSION, NO MORE ROAD-BLOCKS, NO MORE NGO-MINISTERS , NO MORE SECESSIONISTS, NO MORE PROTECTED PIRATES, NO MORE CORRUPT ELDERS iyo kuwo kale oo badan. Ballanteennu waa barqadaas. C. M. Cusman Email: dhaxalreeb@gmail.com Somaliweyn Media Center “SMC”
Somaliweyn Media Center (SMC)  |
|
|||||||||||||||||||||||||||||||||||
