| Somali News | ||||||||||||||||||||||||||||||||||||
|
||||||||||||||||||||||||||||||||||||
KA DARAN OO DIBI DHAL!!!
6 Juun 2009 SMC Dadku waxey dhibaato qabiil oo uu horkacayay qab-qable ku soo jireen muddo ku dhawaad 16 sano ah waxeyna hami nabadeed iyo rajo soo gashay markii meesha laga saaray nimankii hoggaamiya-kooxeedyada ahaa oo aan 2 qofi ku muransaneyn dambiile-nimadooda. Wey jireen ama wey laahaayeen taageerayaal laakiin haddana, qof waliba oo ka mid ah dadka la shaqeynayay wuxuu ogaa in ninkan qalad wado balse qabiil jaceyl ayaa ku xambaarayay inuu madaxa saarto, Museylama oo ahaa ninkii nebinamada sheegtay, reekiisu waxey dheheen “BEENLOWGA REERKEENA AYAAN KA JECELNAHAY RUNLOWGA REERAHA KALE (Nebi Muxamed scw)” waxaan ula jeedaa cid waliba way ku baraarugsaneyd raggaa qaladkooda oo ma jirin qof u difaacayay waddo saxan ayuu ku socdaa darteed. Qof waliba wuxuu sawirtay in dhibkii dhammaaday mar haddii raggaa laga takhalusay, in la gaaray waqtigii ey soo afjarmi lahayd colaadda Soomaaliya ka jirtay, in la joogo waqtigii dib loogu noqon lahaa dhulkeena hooyo, in ey tahay waqtigii laga sheekeyn lahaa wixii dhacay xilliyadii dagaallada, in ey timid waqtigii dib u midoobidda iyo in ummaddu u bislaatay in ey wax wada qabsadaan iskan hilmaamaan qabyaaladda ka reebtay asaagood. Waxaa la wada aaminsanaa maadaama wadanku gacanta u galay rag wadaado ah, in wixii ka dambeeya maalinkaas eynan jiri doonin dagaal iyo caddaalad darro laakiin waxaa bedelay dhammaan rajadii fiicneyd wax aan wali qofna filan, KA DARAN OO DIBI DHAL, waxey maanta taagan tahay in niman wadaado isku sheegaya oo ku sheekeyn jiray in ey yihiin rag ka damqaday dhibaatada shacabka lagu hayo, oo fiirsan waayay boobka masaakiinta, una dulqaadan waayay dadka macna darrada la isaga dilayo, ey si arxan-darro ah oo ka xun waliba xilligii hoggaamiya kooxeedyada u baabi’iyaan shacab aan waxba ka galabsan. Markaad dib u fiirsato hadalada ey isku dhaafsadaan warbaahinta, waxaad dareemeysaa waxa la isku hayo in eynan aheyn xaq iyo xaq darro midna ee uu yahay xukun jaceyl uun, REER MUCAARAD warkoodu wuu cad yahay, haddii la yiraahdo: “maxaad shacabka ugu turi la’ dihiin oo dowladdu wadahadal bey ku baaqdaye u hor fariisan weydeen si dhiigga shacabka loo baajiyo?” Jawaabta soo noqnoqotay ee dadku dhibsaday waa “marka laga tago sheegashada dowladnimo AMISOM-na dalka ey ka baxdo ayaan joojineynaa dagaalada” Anigu waxaan u fasirtay nuxurka warkaa “shacabka waan baabi’ineynaa, hantidoodana waan burburineynaa illaa aan anaggu u noqono MADAX ey hoostooda joogaan” tacsiyada hawada loo marsiinayana waxaan u arkaa KU DIGASHO, waan ku dilayaa oo madaafiicda lagugu xusuuqayo ayaan amarkooda leeyahay, markaad dhimato ama dhaawac noqotana tacsi ayaan hawada kuu soo marsiinayaa islamarkaana waxaan ugu bishaareynaya dagaal cusub inta ka badbaaday kii hore, macno aan DIGASHO aheyn oo ey leedahay anigu ma garan karo. Haddii aaney meesha ku jirin kursi-jaceyl maxaa diidaya in si shuruud la’aan ah ey ula fariistaan dowladda oo ey iska daayaan gor-gortanka shacabka baaba’aya dushooda? Waxey u badan tahay in lagu heshiiyo wadahadalkaas, waayo raggan waa rag muddo isla soo shaqeeyay kuna kala tagay kaliya qaabkii dalka looga saari lahaa Ethiopaia, dhanka kale Soomaalidu waxey tiraahdaa “NIN KALIGII GARRAMAY IYO NIN DHUL GANAYBA WALIGOOD MA GAFAAN”waxaa meesha ka baxaya isla saxnida qof waliba ismaleeyay markuu kaligii garramayay. Haddiiba ey dhacdo in la isku afgaran waayo caqabadduna tahay dowladda oo diidan wax cad oo umadda dan u ah, maxaa ku jaban markaa kadib in lala tashado culumada lana qaato go’aan meelo badan laga fiirayay oo ah kan ugu dhibka yar ee lagu gaari karo badbaadinta diinta iyo umadda dhiiggeeda daadanaya? Waxa aan maanta la yaabanahay ayaa ah, rag culumo sheegta oo qaarkood aqoonta diinta meel sare ka gaaray ayaa hoggaaminaya madaafiicda lagu leynayo shacabka masaakiinta ah isla markaana haddii la wareysto la taagan anaga ayaa howl-gal fulinay, war ALLAH baan idinku dhaariyee wax-qabadkiinu ma wuxuu noqday in dadka madaafiic lagu laayo AAYAD QUR’AAN ahna loo daliilsado. Hadda kahor baa HABAR baadi waxareed ey ku jirto laga sheegay “ Illaahow waxarteyda ha geyn xero wadaad MIDDI UU KU GOWRACDANA WUU HEYSTAA CILMI UU KU BANNEYSTANA WUU YAQAAN” Kollay sida muuqata wadaad iyo hoggaamiye kooxeedba waxey ka midoobeen kursi-doonnimo balse wadaadadu waxey dheer yihiin aayad u daliilsi, waxaana dhihi lahaa, war Allah ka baqa oo ku xisaabtama in falka aad ku jirtaan la idinku weydiin doono ALLAH hortiisa dhinaca kale haddii aad dooneysaan in AMISOM la bixiyo, ogaada in lagu saari karo midnimo kaliya. Fursad ayaad heysataan maadaama ninka maanta u madaxda ah dowladda uu yahay Sh. Shariif oo ah nin aad fahmi kartaan. dowladdiisuna waxey qaadatay ku dhaqanka shareecada islaamka, marka haddii aanan dhib-doon la aheyn waxaan aaminsanahay in wax waliba dhaw yihiin balse ey u baahan tahay in lagu wajaho cilmi iyo degganaan, haddii kale waxa maanta faraha lagu haya ayaad lumin doontaan dhib ballaaran oo aan Soomaali ka soo kabsanna waad sababi doontaan. Waxaa dhici karta in aad isweydiisaan “muxuu qoraagu u xusi waayay qaladaadka dowladda?” Wey jiraan qaladaad farabadan oo dowladdu leedahay iyo in baabi’inta shacabka lagu hayo ey qeyb weyn ka tahay, laakiin haddii la isfahmi waayo ama la is khilaafo waxaa lagu xallin karaa WADAHADAL, dowladduna waa mid ku baaqda mar waliba in lawada fariisto, waxey qoorta u dhiibteen culumada iyo odayaasha si xal loo gaaro sidaa daraadeed ayaanan aqoon haddii aan dhaliilo wax aan ku taliyo oo ka fiican WADAHADAL. Gebagabadii waxaan ALLAH ka baryayaa in uu dhulkeena NABAD noogu soo dabbaalo gaaladana naga saaro wixii xumma-doon ahna naga qabto la gooyo. Axmed Cali
Somaliweyn Media Center “SMC”
Somaliweyn Media Center (SMC)  |
|
|||||||||||||||||||||||||||||||||||
